pandore

PANDORE, Nom propre de femme, Pandora. Apres que Promethée eust desrobbé le feu du ciel, Jupiter pour se venger des hommes, donna charge à Vulcan, qu'il fist de terre une statuë de femme la plus belle qu'il pourroit, et qu'il l'animast, luy donnant ame et vie: ce qui fut faict. Apres qu'elle fut animée, par commandement de Jupiter un chacun des Dieux luy donna ce qu'il avoit de plus excellent: comme Venus la beauté, Pallas la sagesse, Mercure l'eloquence, et les autres Dieux de mesmes. Or en ce temps là les hommes vivoient sans peine et sans souci: d'autant que la terre, sans estre labourée, leur produisoit toutes choses necessaires à vivre. Jamais n'estoient malades: jamais n'envieillissoient. Mais Jupiter mit à Pandore (ainsi se nommoit cette femme) un vase en main, dans lequel estoient encloses les maladies, la vieillesse, les soucis, et telles autres malheuretez: puis l'envoya vers un frere de Promethée, qui se nommoit Epimethée, homme de peu de sens: lequel (combien que son frere l'avoit bien adverti de ne recevoir aucun present qui vint de Jupiter) toutesfois se laissa par elle abuser, et la receut. Estant receuë, elle ouvrit son vase, et remplit tout le monde des drogues que j'ay cy dessus nommées. La raison de son nom est telle. Pan en Grec signifie Tout: et Doron est à dire un don ou present. Elle fut donc nommée Pandore, parce que chacun des Dieux luy fit un don ou present.

Thresor de la langue françoyse. Jean Nicot.